PawsHub HK
關於我們
Pawshub HK
大家好，我叫Ivan
我由有記憶開始，屋企就有養狗，仲記得當時第一隻狗叫思思，好可愛嘅松鼠狗女黎，我同我妹妹大家都好想抱佢，但狗狗就得一隻，所以屋企人就決定加入一位新成員，叫‘’朱古力‘’，朱古力係玩具貴婦狗女黎，之後我同妹妹就冇再為狗狗而打交😂
之後思思同朱古力都生左小朋友，高峰期時期屋企有9隻小狗！真係非常熱鬧，屋企門口一有人，就會變超級狗狗合唱團！
後來，隨住我慢慢長大，狗狗都一齊長大變老，直到狗狗開始一隻一隻離我而去嘅時候，當時我一直都問自己一個問題，如果我嘅寵狗知識更加豐富，更加入面，狗狗會唔會可以陪我更耐呢？
呢位諗法一直都係我腦海揮之不去，後來我大學選科時，都選擇左修讀獸醫醫學科學，不過我並唔係獸醫，好多人都對呢一個課程名有誤解。
我只係希望學習更多幫到狗狗嘅知識，所以選擇呢個課程。
直到2025年11月，經歷了4年，係香港番過十份工作嘅社會洗禮，我了解到自己個心一直都好鍾意幫人，鍾意幫狗狗，鍾意分享，所以當時就決定，做自己真心熱愛嘅事情，就係分享狗狗嘅科學及實用知識，去幫助更多嘅狗主了解自己嘅狗狗，同埋點樣令狗狗更健康，去陪主人行更遠嘅路。
最後係2025年11月28號，Pawshub.HK就誕生了！而家我地嘅目標係，分享更加更加多嘅狗狗知識， 搜羅世界各地，可以令狗狗更健康嘅產品去比大家！
希望可以對香港嘅狗狗社群，製造更多嘅正面影響！
同埋我係2026年學到，而又最有用嘅一句說話係：
少說話，多做事。
所以講住咁多先❣️
大家如果係街度見到我，就大叫Ivan啦！到時我地再慢慢傾😎
認識我們的團隊
花花
狗狗成員
我叫花花小姐，而家一歲半，我係一隻迷你松鼠狗。
我嘅強項就係用我嘅可愛同埋軟綿綿嘅毛去令融化所有人類，去令所有人開心同快樂。
雖然有時我真係好嘈又多嘴，但好彩我屋企人都仲係好錫我，無唔要我！（感恩啊😮💨）
Coco
狗狗成員
我叫Coco小姐，而家十三歲，我阿媽「Donut小姐」喺得一歲嗰陣就生咗我。
我係一隻啡色嘅玩具貴婦狗，最鍾意夏天同陽光嘅感覺。
我最愛嘅活動就係曬太陽同埋同屋企人一齊hea。
不過我好敏感，亦都好容易嚇親，所以有時會好似貓或者老鼠咁，視乎情況而定。
但就因為我呢個性格，我成為咗屋企嘅最佳守衛——有人嚟到門口我一定會第一時間通知大家！
粒粒
狗狗成員
我叫粒粒小姐（Lup Lup），我係一隻啡色嘅玩具貴婦狗。
我喺九歲嗰陣因為急性腎衰竭離開咗，屋企人當時好傷心，不過慶幸我離開之前冇太多痛苦。
我阿媽「朱古力小姐」喺一歲嗰陣生咗我。
我最鍾意就係黏住人，特別係依偎喺我啲主人身邊，因為我好鍾意人類同埋被人抱。
我嘅一生都過得開心又幸福，充滿咗愛同歡樂。
而家我喺好遠好遠嘅地方，過緊另一個同樣美好嘅生活。 🌈🐾
Donut
狗狗成員
我叫Donut小姐，我係一隻迷你玩具貴婦狗，而家十四歲啦，同時都係「Coco小姐」嘅親生媽媽。
我好鍾意曬太陽，仲鍾意同屋企人一齊散步。
雖然我有條尾，但好多人都唔知道，因為我性格好膽細，一出街就會驚驚哋，所以成日都收埋條已～哈哈。
早排我啱啱經歷咗急性胰臟炎，好彩而家已經康復晒，打算繼續開心咁生活多十年！ 🐶☀️💪
豆豆
狗狗成員
我叫黑豆小姐(豆豆），睇我張相你應該就知道點解我會改呢個名啦～
我阿媽係「朱古力小姐」，佢喺得一歲嗰陣就生咗我。
我係一隻迷你玩具貴婦狗，十二歲嗰陣因為癌症而離開咗。
我超級鍾意人類，真係好鍾意嗰種，只要見到人我就會衝埋去，等佢哋摸下我、抱下我。
我仲好鍾意笑，不過有時因為我太黑，大家未必睇得出哈哈。
有時主人熄咗燈之後搵唔到我，我就會露吓個笑容，等佢哋見到我啲閃令令嘅白牙～
而家我喺天上面，等緊下一個機會再同我摯愛嘅屋企團聚。
轉世進行中……🐾💫
Ceci
狗狗成員
我叫Ceci小姐，我係一隻迷你松鼠狗。喺十二歲嗰陣因為器官衰竭而離開咗。
我最鍾意曬太陽，仲好鍾意成日黐住屋企人。
我好多嘴，又鍾意世界和平，所以每次喺街見到人哋拗交，我都會走去中間對住兩邊吠，想叫佢哋冷靜啲～好多時都真係有用㗎哈哈！
不過講真，唯一可惜嘅就係我走之前嗰兩年病得幾辛苦，但我覺得全部都值得，因為我可以多同我最愛嘅屋企人相處多兩年。
而家我喺一個好遠、好靜、冇痛苦、冇人拗交嘅地方，繼續過緊平靜又開心嘅生活。🌈🐾
朱古力
狗狗成員
我叫朱古力小姐，我係四隻迷你玩具貴婦狗嘅媽媽——兩個仔兩個女。
我喺十六歲嗰陣離開咗，大概係因為年紀大啦，不過我一生都算健康快樂。
我好錫我嘅屋企人，而佢哋都一樣好愛我。
我最鍾意曬太陽，仲好鍾意去沙灘行下，嗰度又靜又有陽光，好舒服。
我有兩個女同我一齊住，佢哋就係「粒粒小姐」同「黑豆小姐」。
至於我條脷成日咁樣，係因為我冇牙頂得返入去嘴入面哈哈～
不過多得咁樣，我變到100% 人畜無害，只算我想咬人，都只係得啲軟綿綿嘅牙肉，同埋一大堆口水🤭
而家我仲保持住「黃家壽命最長狗狗」嘅紀錄！
希望我啲拍檔「Donut小姐」同「Coco小姐」有機會打破我嘅PR啦～🐶☀️💖
SAVE UP TO 70%
新產品登場！
In consequat, quam id sodales hendrerit, eros mi leo, nec lacinia risus neque tristique augue. Proin tempus urna vel congue elementum.